Мөрий

10 шил пийвтай боллоо :-)

Мөн 5-р тоглолтоор ажлын залуутай мөрийцсэн өдрийн хоол бас байгаам байна.

Өөд өөдөөсөө өрсөн өөр өөр Монгол

Өөрийн захиалан уншдаг "Үндэстний тойм" сэтгүүлийн 2011/06/06-ны №22(70) дугаар дээр нийтлэгдсэн Д.Энхболдбаатарын "Өөд өөдөөсөө өрсөн өөр өөр монгол" нийтлэлийг илүү олон хүн уншаасай гэсэн үүднээс өөрийн блог дээрээ ямар нэгэн өөрчлөлтгүйгээр хуулан бичлээ. Энэ нийтлэлийг уншаад нэгийг бодож, өөрсдийн болон үндэс угсаа нэгтэй өвөрмонгол ахан дүүсийнхээ өмнө ямар ирээдүй хүлээж байгааг бодон тунгаана бизээ. Сэтгэл эмзэглүүлсэн бодит үнэн, харамсаад ч барахгүй түүхийн нугачааг яалтай билээ.

МЭРГЭНИЙ МӨР


Толгой хэсэг нь улаан нялга болж, хоёр хөл нь санжигнан няцлуулсан хүний цогцсыг хүрэн дээлтэй өвгөн засаж байгаа дотор арзганам зураг интернетээр цацагдаж дэлхий нийтийг хиртхийлгэлээ. Хятадын тээврийн "Чун Чэнг Групп "-ийн жолооч нүүрс тээвэрлэдэг хүнд даацын машинаар өвөрмонгол малчныг санаатайгаар дайрч хороосон хэрэг явдлын дуулиан өнгөрөгч сарын эхээр ийнхүү боссон юм. Энэ компаний тээвэрчид баруун Үзэмчний газар нутгыг талхиж, талын бэлчээрийг доройтуулан, дурын газраар хэдэн арван салаа зам гарган давхих болсныг малчид эсэргүүцэн тэмцэж байжээ. Тэмцлийг удирдаж байсан хүмүүсийн нэг нь тэрхүү машинд дайруулсан, талийгаач Мэргэн аж. БНХАУ-ын харьяанд, өөртөө засах автономит эрхтэйгээр оршиж байгаа Өвөр Монголын тухай, тэндхийн хүмүүсийн эрх, эрх чөлөөний тухай бидний бараг мартах шахсан сэдвийг энэ үйл явдал зүй ёсоор сэдрээв.
Санаатай аллага үйлдсэн хятад жолоочийн хэргийг хууль хяналтын байгууллага нь хэрэгсэхгүй болгох тал руу хазайлгаж эхэлсэн нь "даарин дээр давс" гэгч болж, Хошууны засгийн газарт талийгаачийн хэргийг зөв шийдүүлэхийг шаардахаар явж байсан хүмүүсийн заримыг замаас нь баривчилсан явдал бүр ч тос нэмлээ. Ингээд Баруун Үзэмчний төв хот Балгар голд малчид цуглан жагсаж, тэднийг цагдаагийн 100 гаруй, цэргийн 200 гаруй хүний бүрэлдэхүүнтэй хүчнийхэн элбэн хориглож эхэлсэн юм. Тэд 100 гаруй тооны малчдыг баривчилсан гэсэн албан бус мэдээ цацагдаж байна. Дараахан нь оюутан, сурагчид жагсаж, Хятадын засаг захиргаанаас шударга ёс, хүний эрхээ нэхэв. Тэмцлийн үеэр бас нэг охины хоёр хөлийг машинаар дайрсан байна.

Бүтэн өдөржин цувааны замыг хааж зогссон малчдын зарим нь малаа хотлуулах, цай унд уухаар явсан хойно архи ууж халамцсан хятад жолооч нар "Манай машин даатгалтай юм чинь нэг муу малчинг дайрахад 40 000 юань л төлнө. Асуудалгүй дайраад гаръя" хэмээн ярилцаж байжээ. Энэ яриа Хятадын жижиг үндэстнүүддээ чиглэсэн бодлого, хүний эрхийн хэм хэмжээг "илчиллээ" гэж дүгнэхэд хилс болохгүй. Монгол хүний "үнийг тогтоосон" жолооч нар бүрэнхий болоход гэрлээ асаан хөдөлж, гурван малчин өөдөөс нь гараа алдлан зогсоохоор оролдохыг юман чинээ тоолгүй хурдаа нэмж малчин Мэргэнийг дайран, 150 метр газар чиржээ.
ЦӨХРӨЛИЙН ЖИНДЭЭ

Хятадын албан ёсны мэдээллийн сайтуудад улсын даргын орлогч Си Жиньпин Италид айлчилж байна, хүүхдийн эрүүл мэндийн байдал илт сайжирч, эндэгдэл зэрэг эрүүл мэндийн үзүүлэлт хөгжингүй орны дунд зэргийн төвшинд хүрсэн, ХКН-ын Гадаад Харилцааны Газрын дарга Ван Жярүй Бээжинд Монгол улсын ЭБЭХ-ний сайд Д.Зоригт нартай уулзав, Хятадын үндэстний цөөнхийн уламжлалт спортын ёсдүгээр наадмын бэлтгэл ажил эрчимтэй явагдаж байна, Төвдийг энх тайвнаар чөлөөлсний 60 жилийн ой тохиож байна гэхчилэнгийн мэдээллүүд хөврөхийг үзвэл энэ оронд гайхалтай амар амгалан байгаа мэт сэтгэгдэл төрнө. Гэвч үнэндээ байдал тийм ч сайн биш байгааг ойрхоны шил дараалсан үйл явдлууд харуулж байна. Төвд, Шинжаан, Тайваны эргэн тойрны үйл явдлуудыг эргэцүүлсэн мэргэжилтнүүд "тэсрэхэд ганцхан сэжим" үлдээд байна гэж таамаглаж байгаа. Дэлхийн худалдааны байгууллагад элссэнээр Хятадын эдийн засгийн дотоод бугшмал байдал сэжүүрээсээ ил болоход хүрч, ялангуяа ажилгүйдэл, инфляцийн нөлөөлөл асар олон үндэстэн, уламжлал, шашин, түүхийн зөрчилдөөн бүхий энэ их гүрнийг үндэс сууриар нь ганхуулж эхэлсэн юм. Мэргэжилтнүүдийн "хүлээж" байсан "ганцхан сэжим" нь Өвөр Монгол байсан юм биш биз гэсэн цуу, дуулиан нэгэнт газар авчээ.
Итгэл найдвар хамгийн сүүлд үхдэг гэж ярьдаг. Харин цөхрөл хэзээ эхэлдэг юм бол? Баруун Үзэмчиний хэрэг явдал зүгээр л "бөглөө мулталсан" хэрэг бөгөөд жинхэнэ учир шалтгаан бүр ӨМӨЗО байгуулагдсан цагаас, түүнээс ч өмнөх үеийн тусгаар тогтнолын эрмэлзлээс эх үндэстэй нь мэдээж юм. Энэ хугацаанд өвөрмонголчууд Ар Монголоо улс төрийн түшиг тулгуур болно гэж удтал найдан хүлээсэн. Гэвч Ар Монголд нь тийм чадвар, эр зориг байсангүй. Ингээд тэд цөхөрч, итгэл алдаж эхэлсэн нь саяын хэрэг явдалд хандаж байгаа хандлагаас харагдаж байна. "Ар Монголчууд хөөрхийлөлтэй, өрөвдөлтэй, үхээнц дорой байна", "Монголын төр, засаг элэг нэгтнүүдийнхээ төлөө огтхон ч дуугарахгүй байгаа нь жигшүүртэй байна" гэхчилэн бичсэн сэтгэгдлүүд, геополитикийн шинэ нөхцөл байдлыг задлан шинжилж, урьд өмнөхөөс илүү глобал маягийн санаа дэвшүүлсэн нийтлэл зэргээс үзвэл одоо тэд биднийг харахаа больсон нь мэдэгдэнэ. Энэ цөхрөл чухам хэзээ эхэлсэн юм бол?


ЗОВЛОНГИЙН ДУРСАМЖ

Өвөрлөгчдийн эрх чөлөөний төлөө тэмцэгч асан Даваасамбуугийн Мөрөн хэдэн жилийн мөнө бичсэн "Миний өчил" нийтлэлдээ ӨМӨЗО-ны нөхцөл байдлыг гайхалтай зураглан өгүүлжээ. Тэрээр Сөнөд хошуунд 1964 онд төржээ. Түүнийг таван настай байхад буюу 1969 онд өөрийнх нь нэрлэснээр "их хядлага" болсон гэжээ. Намтар дурсамж гэж болох нийтлэлдээ тэр, "тэр үед миний дүү охин нэг настай байлаа. Эцэг минь хорих газарт явж, ээж минь сумын хорих газарт хоригдож байлаа. Ээж маань хааяа ганц нэг ирээд дүүг хөхүүлдэг. Нэг охин дүү өвчлөөд байхад Маогийн томилсон, монголчуудад туслах гэсэн нэртэй эмч нар муу хүний хүүхэд, улсаасаа урвагчийн зулзага гээд хорт зүү тавин алав. Миний эцэгтэй хамт ажилладаг Монгол улсад сургууль төгссөн эмэгтэй багшийг Монголын тагнуул хийсэн баримтаа гарга гэхэд угаас түүнд тийм баримт байхгүй тул эхлээд хятад эмэгтэй Ху овогт, дараа нь бусад алан хядагч нар түүний бэлэг эрхтнийг нь олсон дээсээр хөрөөдөж дараа нь бэлэг эрхтэнд нь цаасан буу тавьж алсан байлаа. 1968-1969 онуудад 45953 хүн алагдав. Мөн 79000 хүн тахир дутуу болов. Хятадаас монголчуудад тулгаж байсан фашист эрүү тамыг тоолж нэрлэхүйеэ бэрх. Орчлонгийн бүх эрүүг амсуулан "Өвөр ардын нам", "Дугуй нам", "Залуусын нам", "Нэгдмэл нам", "Найрамдал нам", "Соёл нам", "Ардчилсан нам", "Өвөр ардын эвсэл", "Улаан булан нам", "Тусгаар нам", "Зүйтэй нам", "Элсэн нам", "Цэвэгжавын нам", "Цогбадрахын нам", "Бургасан нам", "Архичин нам", "Хүүхэнчүүд нам", "Хомоол нам", "Аргал нам", "Чимэглэл нам" зэрэг зохиомол намд тулгаж монголчуудыг хядаж байжээ" гэхчилэн бичжээ. Тэрээр Өвөрмонголдоо байх аргагүй болж, Шведэд дүрвэн амьдарч байгаад 2003 онд таалал болсон юм.

"ШИНЭ МОНГОЛ" ҮЗЭЛ

Улаанбаатарт аспирантурт суралцаж байгаа өвөрлөгч нөхөртөө би "цөхрөл хэзээнээс вэ?" гэсэн асуултаа тавив. Тэр миний анзааргатайг олзуурхангаа, үнэхээр өвөрмонголчууд ар монголчуудаасаа юу ч хүсэн хүлээхээ больсныг "илчилсэн" юм. Түүний тайлбарласнаар, 100 жилийн өмнөх Богд хаант Монгол Улсын үед ид сэргэн идэвхижсэн "Нармай Монгол"-ийн үзэл санааг өнөөгийн ар монголчуудын "Шинэ монгол"-ын үзэл санаа гээчтэй сөргөлдүүлэн тавьж буй юм байна. "Шинэ монгол" үзэл гэдэг нь хуучин Зөвлөлтийн оролцоотойгоор одоогийн Монгол Улсыг байгуулсан Большевик маягийн дотоод, гадаад бодлогоор боловсорогдож, улмаар Орос, Хятад гэх хоёр гүрнээс мөнхийн харьяат байдалд "төвийн сахисан", "дипломат улс төр"-ийн аргаар олон улсын эрхээ "баталгаажуулсан", хэтдээ нийт монголчуудын оршин тогтнох эсэх эрх ашгийг төлөөлүүлсэн үзэл гэх. Энэ нь зөвхөн Монгол Улсын хилийн дотор л монголчууд монгол биш болсон гэх "шинэ үзлээр" баяжсаныг ч тэр тайлбарласан юм. Өвөрмонголчууд нэгэнт хятадчилагдаад дууссан тул тэдэнтэй нэгдэж нийлэх нь харин ч "оргиналь" монгол үндэстнийг уусган мөхөөх аюултай гэж. "Шинэ Монгол" гээч үзэл санаатай болчихсон ар монголчуудаас юу ч хүсэн хүлээгээд нэмэргүй агаад геополитикийн хувьд ч бие биендээ өмөг түшиг болж чадахгүй гэсэн цөхрөлөөр тэд нэгэнт "өвчилчихжээ". Цаашлаад "Шинэ Монгол" үзэл санааны уг сурвалж нь Хятадын уусган устгах бодлого бөгөөд "Монголын төрийн өндөрлөгт байгаа эрлийз голцуутай лобби бүлгээр дамжуулан Хятад өөрсдийн эрх ашгийг гүйцэлдүүлж байдаг" аж.

"АР ТАЛ"-ЫН АСУУДАЛ

Төвдөд явуулж байгаа хөрөнгө оруулалтын болон засаг захиргааны шинэчлэлтийн бодлогодоо илүүтэй анхаарал хандуулж байгаа Хятадын засгийн газарт Баруун үзэмчиний жижигхэн "будлианыг" ойшоож үзэх ноцтой нөхцөл байдал бий болоогүй ч гэлээ Өрөмчийн бослогыг дарсан үеийнхтэйгээ яг адилаар интернет болон мэдээллийн сүлжээг тасалж, хил гаалиар орж гарах хөл хөдөлгөөний хяналтыг чангатгажээ. Хамгийн сүүлд буюу тавдугаар сарын 23-нд болсон жагсаал цуглааны мэдээг мэдээлснээс хойш өвөрмонголын "үндэсний үзэлтэй" блог, сайтууд ямар ч шинэчлэл хийхгүй боллоо. Саяхан албан хэргээр Хөх хотод оччихоод буцахдаа нэг танил маань, хилийн шалган дээр нөүтбүүкээ асааж шалгуулан, сүүлийн үед бичсэн хувь, хувьсгалын бүх мэйлээ үзүүлж, утга агуулгыг нь тайлбарлаж байж гарч иржээ. Жагсаал цуглаанд оролцсон болон баривчлагдсан хүмүүс хэрхсэн талаар мэдээлэл олж чадсангүй. Энэ удаагын бяцхан тэсрэлтийг Хятадын Засгийн газар ингэсгээд нухчин дарчих л байх. Учир нь бидэнд итгэж найдахаа болиод, цөхөрч гүйцсэн өвөрлөгчдөд маань "жинтэй ар тал" байхгүй байгаа нь асуудал юм. Төвд, Шинжааны тэрслэгчид манайхны хэлэх дуртэйгаар "стратегийн" холбоотнуудтай. Тэмцэж архагшаад, лууг атиралдуулж, арвагануулж чаддаг болчихсон хүчнүүд. Хэдий тусгаар тогтнолын олон жилийн тэмүүлэлтэй ч гэлээ өвөрмонголчууд том колончлогчдоо арай л "жижигдэнэ".

АНУ-ын Номхон далайн тэнгисийн флот "Шинжаан бол хоёрдахь Косово" гэсэн агуулга бүхий хээрийн сургуулилтыг саяхан Казахстанд хийсэн. Өнгөрсөн онд Солонгосын хойгт дайн дэгдээх шахсан цэргийн сургуулилт нь АНУ цэрэг эдийн засгийн сонирхлоо Ази, Номхон далайн чигт хандуулсны хамгийн бодитой нотолгоо болж өнгөрсөн. Эдгээр бүс нутгийн улс төрийн үйл явдалд АНУ түлхүү анхаарч, тэр байтугай Ойрхи Дорнод болон Номхон далай гэсэн хоёр чиглэлээр "цөмрөн орох" бодлого баримталж байгаа нь Хятадын хойд нутгийнхны хувьд шинэ нөхцөл бий болгож байгаа гэж дүгнэх үндэс болж буй. Японтой эдийн засгийн болоод улс төрийн холбоотны харилцаатай АНУ-ын гүн гүнзгий шинэ түнш нь БНСУ болсныг үйл явдал нэгэнт харуулсан. АНУ-Япон-Солонгосын энэхүү ашиг сонирхлын тэнхлэгт байгалийн баялгийн "сүүлийн түшиц газар" гэгдэж байгаа Зүүн хойд Азид тулах гэц хэрэгтэй гэж стратегийн мэдлэгтэй зарим хүн дүгнэлт өгч буй. Мэргэжлийн байгууллагуудын хийсэн зарим судалгаанд 2030 он гэхэд манай гаригийн эх газрын хэвлийн нөөц баялаг үндсэндээ дуусгавар болох ба зөвхөн Төв болон Зүүн хойд Азийн тэгш өндөрлөг, далай тэнгисийн гүний нөөц дэлхий нийтийн материаллаг эрэлт хэрэгцээг хангана гэж үзэж байгаа юм. Энэ мэт барим тавим таамаг, судалгааны дүн нь ортой, оргүйн алин байлаа ч нөлөө бүхий гүрнүүдийн ашиг сонирхлыг огтлолцуулахад хангалттай хүрэлцэж байгаа нь дамжиггүй.

Үндэс угсаа нэгтэй Өвөрмонголын ахан дүүсийнхээ эх нутаг, эрх чөлөөний төлөө хийж буй тэмцлийг дэмжиж монголчууд Улаанбаатар дахь БНХАУ-ын ЭСЯ-ны үүдэнд эсэргүүцлийн цуглаан зохион байгууллаа. Үндэсний үзэлтэй бүлэглэлүүд, монгол улсад ажиллаж, амьдарч байгаа өвөрмонголчууд энэ цуглаанаар жижиг үндэстнүүдийнхээ эрхийг хангах, аливаа харгислал, дарангуйллаа зогсоохыг Хятадын засаг захиргаанд шаардав. Хас тэмдэгтэй туг, Монгол улсын төрийн далбаагаар өнгө зохируулсан цуглааны үндсэн агуулга нь монгол үндэстнүүдийг эв нэгдэлд дуудсан уриа байв.
НЯЦААГДААГҮЙ ҮНЭН

Ар монголчууд өвөрлөгчдөө Хятадаас булаан авах гэж хоёр ч удаа дайн хийсэн юм. 1945 оны Чөлөөлөх дайнд Монгол ардын арми оролцсон нь өнгөн дээрээ "Монгол-Зөвлөлтийн харилцааны туслах гэрээний үүрэг" гэх тайлбартай боловч цаанаа өөр яриа хөөрөөтэй байсныг түүхчид ярьж, бичсээр байгаа. И.В.Сталин гадаад, дотоод монголын асуудлаар Маог хүртэл нээнтэглэж байсан удаа бий. Монгол, Зөвлөлтийн цэрэг Өвөрмонгол руу орж ирснээр тэндэхийн тусгаар тогтнолын тэмцэл,хөдөлгөөнийг сааруулж, эцэст нь унтраахад хүргэжээ гэсэн түүхийн тайлбарыг сүүлийн үед өвөрлөгч эрдэмтэд хийх болсон байна.

Хүйтэн дайн дуусгавар болсон 1990-ээд оноос Ар Монголд оюун санааны задрал болж, өмч хөрөнгө, үзэл ухамсар, шашин шүтлэг хүртэл глобалчлагдан, сарниснаар үндэстний хувьд жинхэнэ ёсоор бутран задарсан гэж өвөрмонгол ахан дүүс дүгнэх болсон байна. Социализмын үед Оросуудын үзэл суртлын нөлөөнд байсан "шинэ монгол"-чууд ардчилалын үед Хятадын хөрөнгө мөнгөний нөлөө бүхий өөр "шинэ монгол" болж хувираад мөхлийнхээ зүгт мөлхөж байна хэмээн тэд биднийг өрөвдөн халаглаж байна.

Агуулга, хандлагын энэ эрс өөрчлөлт гадаад, дотоод монголчуудыг 180 хэм эргүүлжээ. Бусдын хамаарал, колончлол, дарлал дор байгаа гэж тэднийгээ өрөвддөг байсан бол одоо тэд биднийг өрөвч нүдээр харж байна. Хамгийн цочирдмоор нь "нармай" -тай эсрэгцүүлэн сөргөлдүүлсэн "шинэ монгол"-ын үзэл санааны тухай шүүмжлэлийг няцаах үг надад олдсонгүй. Асар том Хятад гүрэн задрах нь дэлхий нийтэд, тэр дундаа Монгол Улсад ашиггүй гэсэн байр суурийг би хувьдаа ортой гэж итгэж буй. Учир нь малын бэлчээрээ өмгөөлөн тэмцэж байгаа Баруун Үзэмчин хошуунд л гэхэд нийт хүн амынх нь ердөө 29,2 хувь нь л монголчууд. Бусад нь хань үндэстнүүд. Их юмны баглаа задарвал сад тавих нь гарцаагүй. Тэр цоорхойгоор хань нь ч, хуйхуй нь ч адилхан гоожно. Харин ч задгайрсан талынхаа жаахан цөөхнийг их нь булж ч мэднэ.

10н шил бар

НБА-гийн финал эхлээд сайхан байна даа.

Дэмжсэн бүх багууд минь хусуулж, захыг нь мушгих баггүй болсон болохоор энэ финалд Даллас Мавриксыг дэмжихээр шийдсэн.

Спурс, Лейкэрс, Хавкс гурав итгэл алдаж гурвуул эхний хоёр даваанд ээлж дараалан бүдэрч урам хугалсан.

Дараа нь тэгэхээс тэгэх гэсэн юм шиг Лэйкерс Майк Броуныг багийн ахлах дасгалжуулагч болгож бүүр ч урам хугаллаа. Одоо яая гэхэв нэг сайн хараагаад л өнгөрөхөөс. Мич Кипчак муу тэнэг.

Далласыг Жэйсон Кид, Шон Марион, Дирк Новицки, гээд бөгж зүүх эрхтэй болсон тоглогчид байгаа болохоор дэмжиж байгаа хэрэг л дээ. Ялангуяа Кид-д л сагсан бөмбөгийн замналаа дуусгахаас нь өмнө нэг бөгж зүүлгэх хэрэгтэй байгаа юм. Ямар агуу тоглогч билээ, нэг бөгжтэй тэтгэвэртээ гараасай л гэж хүсэж сууна.

Ахтайгаа мөрий тавьж Даллас түрүүлбэл 10 шил Тайгер шар айраг авч, Маяами түрүүлбэл 1 шил улаан дарс авч өгөхөөр болсон. Аль нь түрүүлэхийг харах л үлдлээ.

Аль нь түрүүлэх юм бол доо ???

Пийв уухнуу, улаан дарс ахдаа барих нь уу харж л сууя даа. Нээрээ нэг онцгүй зүйл нь финалын нэг ч тоглолт манай улсын цагаар амралтын өдөр гарч таарахгүй юм байна лээ. Броузерийн жижигхэн цонхонд Alt+Tab дараастай л хэсэг хэсгээр үзэх нь дээ.

Плэйофф ба миний таамаглал - 1

Дэлхийн хамгийн шилдэг лиг хамгийн сонирхолтой үедээ орох энэ мөчид хэдэн сар жилээр юм бичээгүй хуучруулсан блогтоо шинэ бичлэг нэмж байна. Юуны тухай гэдгийг тайлбарлах нь илүүц биз.

Плэйоффын эхний даваа ба миний таамаглал.

Өнөөдөр тоглох дөрвөн багийн таамаглал.

Chicago Bulls(62-20) - Indiana Pacers(37-45)

Чикагогын нялх бухнууд энэ улиралд ямар мундаг тоглож байгааг хэн хүнгүй л харж байна. Шагналаа аваагүй байгаа MVP (???) Деррик Рөүз, солилцоогоор ирсэн бүх одод тоглогч Карлос Бүүзэр, өсөн сайжирч байгаа Ноа нартай энэ багийн амжилт салшгүй холбоотой. Эхний тойргоо итгэл төгс даваад гарчихна гэдэгт итгэлтэй байна.

Тэдний өрсөлдөгч нь тийм ч сайн амжилттай биш Индиана. Од ч юм шиг биш ч юм шиг орон гаран тоглолт үзүүлдэг Дээни Грэнжер, Рой Хибберт, Майк Данливи гээд плэйоффын туршлага төдийлэн байхгүй залуучууд байгаа. Индиана энэ амжилтаараа өрнөд бүсэд байсан бол 12-р байранд байх байлаа. Дорнод бүсэд харьяалагддагтаа баярлах хэрэгтэй байх.

Чикаго 4-1 ээр цувралыг дуусгана гэж таамаглаж байна.

Philadelphia 76ers(41-41) - Маяами Хийт(58-24)

НБА-г үздэг сонирхдог хүмүүс гурван том бүлэгт хуваагддаг байх гэж би боддог. Жорданыг дэмжигчдийн бүлэг, Кобиг дэмжигчдийн бүлэг, Лэброныг дэмжигчдийн бүлэг гэж ... Хараад байхад 90-ээд оны НБА сонирхогч нар Жорданыг шүтэж, харин түүний дараагийн үеийн дэмжигч нар Кобиг Жорданы агуу амжилтын араас хөөж тоглож байгаа болохоор үзүүлэлт, статистик амжилтаар нь харьцуулдаг. Харин Леброн бол од болж гялалзаж гарч ирсэн цаг хугацаа нь Кобигийнхтай давхарддаг учраас хүмүүс энэ хоёрын тулааныг аваргын төлөө үзэхийг хүсдэг юм. Ийм финал болох аваас НБА-гийн түүхэн дэх хамгийн олон үзэгчтэй, хамгийн сонирхолтой финал болно гэдэгт огтхон ч эргэлзэх хэрэггүй. Гэвч ийм сайхан учрал тохиохгүй байсаар хэдэн оныг өнгөрөөлөө. Ийм финал болохгүй байгаад Леброн л буруутай. Коби бол сүүлийн гурван жил дарааллан финалд гараад ирсэн шүү дээ. Ганц дайчин ганцаарддаг гэдгийг мэдэрсэн Леброн Драфтын нэг ангийн хоёр сүпер одтой үгсэн хуйвалдаж нэг зорилгын төлөө тоглохоор болжээ. (Энэ гурав нэг багт орсоныг урьдчилсан тохиролцоо гэж боддог.) Тэдэнд бөгж л хэрэгтэй. Өөр юу ч хэрэггүй. Харин бөгжтэй болохын тулд тэйм.

Дорнод бүсийн 7-р байраар шалгарсан 76-чууд бол зөөлөн боорцог биш. Гэхдээ хатуу самар байж хараахан чадахгүй л болов уу. Тэд их гурвалын эсрэг юу хийж чадах вэ ???

Цувралыг 4-2 харьцаагаар Маяамигийн халуухан залуус дуусгана гэж таамаглалаа.

Atlanta Hawks(44-38) - Orlando Magic(52-30)

Плэйоффын нэгийн давааны хамгийн ширүүн тоглолт гарах цуврал гэж таамаглаж байна. Одоо тоглож байгаа хамгийн дөнгүүр төвийн тоглогч Шкафан цээжтэй Ховард, Хүчирхэг хулгана Жамеер Нелсон, турк залуу Хедо гээд л Орландо гарцаагүй сайн баг. Гол нь энэ багт довтолгоог эхлүүлдэг найруулан тоглогч дутуу юм уу даа гэсэн бодол байдаг. Дасгалжуулагч багаа нэг л хангалтгүй тоглуулаад байна уу даа. Харин Атланта бол Хорфорд, Смит, Жое Жонсон гээд залуучуудынхаа хүчээр хэдийнээ плэйофф-н баг болсон. Гэхдээ мөн л сүүлийн хоёр плэйофф-д хоёрдугаар шатаа давж чадаагүй гэсэн тааруухан амжилттай байгаа.

Улиралд энэ хоёр багын хоорондын харьцаа нь Атлантагын талд илүү байгаа шиг санаж байна. Гэхдээ л яаж ч магадгүй юм, аль нэгийг нь хожно гэж таамаглахаасаа ч айж байна. Гал гаргасан цуврал болно гэдэгт итгэлтэй байна. 4-3 - аар Атланта хожно гээд буудчихвал яадаг бол :P Долоон тоглолт бол болох байх. Харин Атланта юу Орландо юу таамаглалыг нээлттэй үлдээлээ. Атлантагийн талд 51 хувь.

Portland Trail Blazers(48-34) - Dallas Mavricks (57-25)

Портланд энэ улиралд ямар мундаг байнаа. Хэрвээ Оден бэртэл гэмтэлгүй Дюрантын хэмжээнд тоглоод (Дюрант - Оден гэсэн харьцуулалт утгагүй мэт санагдаж болох боловч нэг драфтын эхний хоёр сонголт учраас харьцууллаа. Дюрантаас илүү гэж үзээд сонгосон шүү дээ уг нь) Рой-н өвдөгний бэртэл байхгүй 100 хувь хүч чадлаа дайчилж тоглож байсан бол энэ баг өрнөдөд хэдийнээ хамгийн шилдэг нь байх байсан гэдэг нь тодорхой. Гэхдээ Алдриж дээрх хоёр тоглолчын дутуу орон зайг хангалттай нөхөж чадаж байгаа. Энэ улиралд магадгүй амжилт нь ахисан тоглогчын шагналыг авч болох юм. Даанч Кевин Лоов байгаа учраас авахгүй байх л даа. Одоо болтол яагаад бүх оддын тоглолтонд сонгоогүйг нь гайхдаг. Дээр нь аваад удаагүй байгаа боловч энэ багийн нэгэн хэсэг болж чадсан Жералд Воллес мөн нь плэйофф-т энэ багийн төлөө бүхнээ дайчилна.

Тэдний немц залуу Новицки тэргүүтэй Даллас Маврикс тулалдана. Жэйсон кидд, чандлер, терри гээд л мундаг тоглогч нар олон бий. Ганц харамсмаар юм нь Батлер гэмтлээс болоод плэйофф-д багтаа туслаж чадахгүй. Далласын тоглолт Терри-гийн тоглолттой холбоотой юм шиг санагддаг. Портландын залуучуудын эсрэг харьж яваа Далласынхан муугүй л тоглох байх, гэхдээ арай нь барахгүй болов уу.

Цувралд 4-2 - оор Портлэнд хожно гэж таамаглалаа.

За ингээд өнөөдөр тоглолт нь болох 8 багийн хувьд таамаглалаа дэвшүүллээ.

Мэдээж үргэлжлэл бий ... Тун удахгүй

Griffin Griffin Griffin

За энэ залуугын тухай бичихгүй бол үнэхээр болохгүй нь. Ийм л залуучууд олноор гарч ирж НБА-г улам сонирхолтой болгоосой. Ихэнх оноогоо гурвын шидэлтээс авдаг евро лигээс ялгагдах онцлог бол энэ л юм байгаа юм шдээ. Хурд хүчны гайхамшиг, өөр хэлэх үг ч алга. Нодлин бэртлээ болж бүтэн улирал өнжихөд нь битгий л гурав дахь Sam Bowie болчихоосой доо гэж бодож байв даа. (хоёр дахь Сем Бовие нь Грег Оден) Байдал өөрөөр иргэж, бүх зүйлийн эхлэл сайхан эхэлж байна. Гэхдээ энэ бол зөвхөн эхлэл. Дахин олон гайхамшигийг үзүүлж, НБА-гийн түүхийг бүтээлцэх болно.

Энэ залуу ямар ч аймар өндөр үсэрдэг юм, ямар ч хүчирхэг юм, аргагүй бахархах сэтгэл төрж байна шүү. Чухам л газрын татах хүчнээс салж чаддаг хүн гэж түүнийг л хэлэх байх даа.

Шон Кемп, Винс Картер, Амаре Студмайер нарын анх гарч ирж байсныг санагдуулж байна шүү. Ямар ч байсан миний тоглолтыг нь үзэх дуртай тоглогч нэгээр нэмэгдлээ.

Blake Griffin


Blake Griffin гээд залууг шүтчихлээ. Хэлэх юм алгөө. Зүгээр л хоёрт орсон тоглолтыг үз.

Нэмэлт үйлчилгээ

Сайн байцгаана уу. Эрхэм хүндэт хэрэглэгчдээ. Бид үнэ төлбөргүй шинэ үйлчилгээгээ та бүхэндээ толилуулж байгаадаа баяртай байна. Бид сар бүрийн эцэст таны яриа болон мэссэжний бичлэгүүдийг бүрэн эхээр нь эхнэрт (нөхөрт) чинь үнэ төлбөргүй явуулж байхаар боллоо. 10:29 AM 11/18 Жич: Хэрэв та манай энэ төлбөргүй үйлчилгээг авахыг хүсэхгүй байгаа бол нэмэлт 10$-г сар бүр нэмж төлнө үү. Mobicom Corporation. Таны Тэмүүлэл биднийг хөтлөнө.

Гэнээ хэхэ. Хөгжилтэй юмаа.

ISP-нүүдийн талаар дүгнэлт.

Гэртээ байнгийн интернет хэрэглэдэг болсноос хойш 5 шахам жилийн хугацаанд 4 ISP - гийн хоёр өөр төрлийн интернет хэрэглэж байсан юм байна. Түүнээс өмнө утасны шугам ашиглаж хааяаа хааяа холбогддог байсан.

1. Хамгийн анхных нь Micom компанийн DSL үйлчилгээ байлаа. Айл өрхөд тавьдаг DSL интернет тийм ч их дэлгэрээгүй байсан үе юм. Ах анх тавиулж байсан, түүнээс нь би салаалаад хэрэглэдэг байлаа. Хурд нь 64kbps, төлбөр нь сард тогтмол 60000 төгрөг байсан санагдана. Төлбөрийг ах төлчихдөг байсан болохоор би ч үнэ төлбөрийнх нь талаар мэдэхгүй, санаа амар "зөвхөн хэрэглэ" гэсэн уриатайгаар net surfing хийдэг байлаа. Тасалдана, хурд нь муу, төлбөрөө төлчихсөн байхад хүртэл үйлчилгээ салгах тохиолдол гардаг байсан. Дээр нь үнэтэй. Яахав тэр үед угаасаа монголын интернет муу байсантай ч холбоотой л байх. Ямар ч байсан гэрт байнгийн интернет хэрэглэдэг болсон нь том дэвшил. Тухайн үед мэдээлэл технологийн газрын дарга байсан Сайханбилэгт баярлаж явах ёстой юм шиг байгаам. Өрх бүрт интернет гээд л зурагтаар яриад байдаг байсан санагдаж байна. Энэ салбарт маш их ажил хийж, энэ салбарыг хөгжүүлэхэд хувь нэмрээ их оруулсан хүн гэж боддог.

2. Magicnet ADSL. хамгийн анх хурд нь 256kbps, үнэ нь сард тогтмол 20$ байлаа. Сүүлд долларын ханш өссөнтэй холбоотойгоор төлбөрөө төгрөгөөр, сарын 25000 болгож өөрчилж байсан санагдана. Хурд нь 256->384->512 болж бага багаар нэмэгдэж байсан. Нэг жил орчим хэрэглэсэн. Тасралт маш ихтэй, хурд нь харин хаа очиж амласандаа хүрдэг байлаа. DSL нь өөрөө телефон утасны сүлжээгээр дамждаг болохоор тухайн газрыг телефон шугамаар хангадаг холбооны салбар ямар байх нь DSL интернетэд маш том нөлөөтэй. Холбооны салбар дээр тог тасрах, холбооны шугам гэмтэх гээд л ер нь интернетийн компаниас шалтгаалаагүй тасралтууд их тохиолддог байсан. Төлбөр онлайнаар төлөх боломж байхгүй, заавал аль нэг банкин дээр, эсвэл төв дээр нь очиж төлдөг байсан. Мөн төлбөр төлөх хугацаа болонгуут шууд л тэр өдөртөө холболт нь тасардаг байсан. Энэ тал дээр ёстой найзгүй дээ, хогын гарууд. Одоо яадаг болсон юм бүү мэд.

3. Sky C&C компанийн DSL үйлчилгээ. Анх тавиулж байхад хурд нь 512 kbps, төлбөр нь сарын 24000 төгрөг байлаа. SkyC&C - гийн DSL тухайн үедээ бусад өрсөлдөгчдөөсөө лав хамгийн сайн нь байсан юм. Төлбөр нь өөрчлөгдөхгүйгээр хурд нь 512->768 болж өөрчлөгдсөн. Гэрийн нөхцөлд бол хангалттай хурд. DSL-н модемоо үнэгүй тавиад өгчихнө. Үйлчилгээ нь маш сайн, гомдол түргэн барагдуулдаг, гомдол гаргахад барагдуулсны дараа заавал эргэж холбоо барьж гомдлыг хэрхэн барагдуулсан, юунаас болж гомдол үүссэн шалтгааныг хэлж тайлбарладаг байлаа. Төлбөрөө онлайнаар төлөх боломжтой нь хамгийн сайхан байсан. Мөн холболтын хугацаа дууссанаас хойш нэг долоо хоногын хугацаанд холболтоо салгадаггүй байсан. Модем нь хөөрхий сүүлдээ харин жаахан миарсан. Ер нь ч тааруухан модем байсан дөө, халалт нтэр нь үлэмж. За ингээд надад давуу тал болж байсан зүйлүүдийг дурьдаад, магтаад байвал их юм бичихээр байна гэхдээ залхуурчихлаа. SkyC&C - гийн интернетийг хэрэглэж байсандаа баяртай байдаг юм аа. Үнэлгээ өгвөл 10-аас 8 гэсэн үнэлгээ өгнөө.

4. MCSCOM шилэн кабел. За ямар ч байсан интернет хэрэглээнд маань том дэвшил гарч, утасны шугамнаас шилэн кабелд шилжлээ. Энэ бол хөгжил. Хурд нь 1mbps, төлбөр нь сарын 29950 төгрөг. 30000 л гэсэн үг л дээ. Бага хэмжээний маркетинг байгаа юм. Хорин есөн мянга есөн зуун тавь гэж сонсох нь гучин мянга гэж сонссоноос хүний чихэнд хамаагүй эерэг, хямдхан сонсогддог байх. Үнэн хэрэг дээрээ зөрөө нь тавин төгрөг байгаа юм. Хурдны хувьд бол яг ч 1mbps буюу 1024kbps - дээ хүрэхгүй, 1000 шахам kbps хавьцаа байдаг юм. Энэ нь ISP - нүүд QoS дээрээ 1000kbps гэж тавьчихаад, интернетээ 1mbps гэж зардагтай холбоотой байх. Дундаас нь 24kbps - ийг хэрэглэгчээс монжиж байгаа хэрэг л дээ. Давуу тал гэвэл монгол серверээс юм татахад хурд нь хязгааргүй, шөнийн цагаар(24-08) хаашаа ч хязгааргүй болдог. Файлыг шөнө татуулаад орхичихвол нисдэг юм билээ. Олон seed-тай Торрент файл ~2.2mbps орчмоор татаж байсан. холбооны шугамнаас ангид, шилэн кабел гэж бодохоор сайхан л даа. Төлбөрийг онлайнаар төлөх боломжтой байсан. Гэхдээ онлайнаар төлж үзээгүй. Тасралт багатай л юм билээ. Эхэндээ их л тасраад байх шиг санагдаад, дуудлагын утас руу нь ярьж гомдоллоод байсан чинь асуудал нь миний гэртээ хэрэглэдэг wireless router - т байж таараад, рүүтэрийнхээ фирмвэйр шинэчлэл хийснээс хойш тасралт байхгүй болсон. Үнэлгээ дүгнэлт өгөхөд арай эрт байнаа. Учир нь 3хан сар л хэрэглэж байна.

Үйлчилгээ авч байсан ISP-нүүдээ дүгнэхэд нэг ийм байна.

Линуксын хэрэглээ

Сая форум уншиж яваад гэнэт нэг ийм зүйл бичмээр санагдчихлаа. Энэ бол линуксын хэрэглээний асуудал. Хүмүүс нэг үеээ бодвол нээлттэй эхийн тухай, линукс системийн тухай бага ч гэсэн ойлголттой болсон байх. Гэхдээ массыг хамарсан нийтлэг ташаа ойлголт, эндүүрэл бас зөндөө бий.

Буруу ойлголтын талаар бичих гэсэнгүй, уг системийн хэрэглээний талаар бичье. Хүмүүс анхнаасаа яг яах гэж энэ системийг хэрэглэхээ сайн тооцохгүйгээр зүгээр л бусдын амнаас ам дамжин яригдаж байгаа виндовсын вирус ажилладаггүй, үнэтэй гэх мэтийн дежурын хэдэн давуу талыг сонсоод шууд л суулгачихдаг. Мэдээж сайн судлаагүй, мэдэхгүй юм чинь асуудал гарч л таараа шүү дээ. Виндовс дээр ашигладаг байсан програмууд нь ажиллахгүй, линуксын адил үүрэгтэй програм нь дасаагүй учраас хэцүү санагдах гэх мэтээр зовоох нь энүүхэнд. Дээр нь файл, хавтасны хандалтын эрх, сүлжээ, хардвэйруудын линукс дээрх драйвер гээд л анхлан суулгагчдад тохиолдох бэрхшээл цөөнгүй. Ашиглаж эхлэх явцад ийм асуудлууд тохиолдоод ирэнгүүт л шууд л үйлдлийн системээ сольж сурсан дассан виндовс-оо суулгаад авна. Харин дараа нь мань этгээдийн амнаас гарах үг болгон нь линукс системийг сөргөөр сурталчилж эхэлнэ гээч. Үүнийг нь линукс хэрэглэж үзээгүй боловч сонирхож буй нэгэн сонсвол тэгээд л хасах оноо тавих нь мэдээж.

Бас суулгачихаад л, тэр програм ажиллах уу? тийм тоглоом ажиллах уу? тэр програмыг ажиллуулмаар байна гээд л асууж өгнө дөө. Нэг танил маань бүр Pidgin-г санал болгосоор байхад "Yahoo Messenger - г л суулгамаар байна дасчихсан амар байдаг юм" гэж байгаад дахин виндовс руугаа шилжсэн дээ. Ер нь тэгээд анх суулгаж байгаа лууван идэж үзсэн хүн луувангаас арай өөр зүйл амтлах бэлтгэлтэй байх хэрэгтэй юм шиг санагдсан. Гол нь тэгээд сэтгэлийн хөөрлөөрөө битгий хандаач ээ л гэж хэлмээр санагддаг.

That's all.

Иргэний шинэчилсэн бүртгэлтэй холбоотой асуудал

Та иргэнийхээ шинэчилсэн бүртгэлд хамрагдаж, хурууныхаа хээг баталгаажуулсан уу?

Би лав аль 9 сард бүртгүүлээд, хурууныхаа хээг баталгаажуулсан. Харин бүртгүүлсэн эсэхээ шалгах ийм сайтыг улсын бүртгэлийн газраас ажиллуулж байгаа юм байна. Гэхдээ энд нэг асуудал байгаа нь бүртгэл баталгаажсан эсэхээ мэдэх гэхээр баталгаажаагүй гээд болохгүй юм. Бүртгүүлэхэд өгсөн жижиг үнэт цаасан дээр бүртгэлээ хийлгэснээс хойш 1 сарын дараа баталгаажилт хийгдэнэ гэсэн байсан юм. Би уг нь 1 сар буюу 30 хоног ч биш 45 хоногын өмнө бүртгэлээ хийлгэсэн юмсан. Бүр 50 хоногын өмнө ч байж магадгүй. Тэгтэл одоо ингээд бүртгүүлсэн эсэх нь мэдэгдэхгүй хачин асуудал үүсэх нь тэр. Үүнтэй холбоотой лавлагааны 1890 гээд утас ажиллаж байгаа гэх боловч холбох шугам чөлөөгүй гээд залгагдахгүй юм. online1890 гээд Яахоо мессенжерийн хаягаар нь юм бичиж үзсэн боловч таг чиг. Ингээд яах учраа олохгүй болов. Иргэний шинэчилсэн бүртгэлд хамрагдаагүй хил гаалиар хүртэл гаргахгүй болно гэж байсныг уншиж байсан.

Манайхны хариуцлагагүй зангаар миний бүртгэлийг орхигдуулж, гээгдүүлсэн юм болов уу ? гэсэн айдас битүүхэн төрж байна. Ажлаасаа хагас өдрийн чөлөө аван барин байж, их л ажил болгон байж очиж хийлгэсэн ажил маань юмсан. Ядаад лавлах утас нь ажиллахгүй юм яаая дөө байз.