Гэрийн бичил ертөнц

Бичих ёстой хүн л блог бичдэг гэж үнэн шүү. Бичих зүйл олдохгүй өдөр хоног өнгөрсөөр блогтоо бичлэг нэмээгүй нэлээн уджээ. Одоо блог бичдэг нэг сэдэв нэмэгдлээ. Аквариумын загас тэжээж эхлэв. Өмнө нь 10 жилд байхдаа 5-р ангиас 8-р анги төгстлөө амьд зулзага төрүүлдэг загас тэжээж байсан туршлага байгаа болохоор дахин тэжээмээр санагдсан юм. Загас тэжээх болсон шалтгаан хэд хэд байна. Загасыг залхуугүй, цэвэрч, нямбай, хоббиндоо зав гаргаж чаддаг, амьтанд хайртай хүн тэжээж чаддаг гэж боддог. Дээрх зан чанаруудыг өөртөө сайн төлөвшүүлэх, амьтныг хайрлах сэтгэлтэй болох сайн талтай учраас загас тэжээгээд үзье гэж бодлоо. Мөн гэр дотор аквариум гэсэн бичил ертөнц үүсэж түүн дотор амьдрал бий болгоно гэдэг сайхан.

Дараах үе шатуудаар тэрхүү бичил эко системээ бэлдлээ.

1. Аквариумаа бэлдэнэ.

Усаа хийгээд, халаагчаа залгаад хонуулна. Карантны ус нь хлортой байдаг болохоор карантнаас тоссон усаа дор хаяж 1 хонуулж байж загасаа хийнэ. Эсвэл Хлор арилгагч гээд загасны дэлгүүрүүдэд үрэл, эсвэл шингэн зардаг юм билээ. Яарсан үед тийм зүйл ашиглаж болох байх.

2. За усаа хонуулж хлорыг нь арилгаад, загас хийхэд тохирох темпратур хүртэл нь халаасны дараа хайрга, ургамал зэргийг хийнэ. Хайрга сонгох, ургамал сонгох зэрэгт аквариумын загас сонирхогчдын блогыг уншиж зөвлөгөө авсан. Аквариумаа тохижуулж, загасаа хийхэд бэлэн болчихоороо загасаа хийнэ.

3. Хорооллын усан оргилуурын ард байдаг загасны дэлгүүрүүдээс Амазонк ургамал, 10 мечнос, 10 суматрын барбус, 4 скаляр авсан. Дандаа нас биед гүйцээгүй жижиг загаснууд авсан юм. Жижгийг авч өөрөө томруулах нь гоё санагдсан л даа. Даанч тун санаанд ороогүй зүйл болсон нь Суматрын барбус нь 10-аараа сүрэглэчихээд Скалярныхаа сүүл сэрвээг шоглож, сахилгагүйтэж эхэлвээ хөөрхий. Уншаад үзтэл угаас энэ гайхал чинь 4-ээс дээш тоогоороо аквариумд байхаараа сүрэглээд, амьдралын идэвхи нь нэмэгдээд урт саглагар сүүл, сэрвээтэй загаснуудын сүүл сэрвээг идэж шоглодог болох нь батлагдлаа. Уг нь бөөндөө бужигнаад сүртэй хөөрхөн юм билээ. Мечносыг ч гэсэн амар тайван байлгахгүй нь тодорхой болов. Болдог бол 3-4 аквариум тавьчихаад л загаснуудыг төрөл төрлөөр нь тусад нь тэжээвэл зүгээр санагдсан. Энэ бодлоо яваандаа хэрэгжүүлнээ л гэцэн байгаа.

За тэгээд уг нь бол хөөрхөн, гэрийн уур амьсгалыг лаг гоё болгож байгаа нь нүдэнд илт. Аквариумдаа загас, ургамалнуудаа хийсэн байх үеийнх нь зураг нь энэ байна.


Ирсэн хүмүүс өхөөрдөөд л, бүгд гоё харагдаж байна гэж хэлсэн. Амьд загас, амьд ургамал, тэгээд устай цэвэрхэн шилэн сав. Хүнд сайхан харагддаг бололтой. За эхлэл нэг иймэрхүү. Янзлах засах, сайжруулах зүйл их байна. Яваандаа бага багаар нь сайжруулж аквариумаа гоё болгоноо.

Үргэлжлэл бий ... :-)


Манзуширын хийд

Блогтоо шинэ ангилал нээлээ. Энэ нь зурган блог байх бөгөөд энд тэнд өөрийн дарсан зургаа тайлбартайгаар нийтлэж байх бичлэгүүд байх болно. Хэдэн жилийн дараа үүнийгээ эргээд харахад сайхан тэмдэглэл болох байх.

Энэ ангилалын хамгийн эхний бичлэг болгоод Богдхан уулын урд Төв аймгийн төв Зуунмод хотоос холгүйхэн байрлах Манзушир хийдэд очиж үзсэн тухайгаа зурагт нийтлэл болгон бичье.

1. Манзуширын хийдийг Google Earth програм дээр зааж, улаан зураасаар тийш очих замыг зурлаа. Авто замын төв цэг хавиас 50 гаран км болж байсан санагдана.


2. Төв аймгийн төв Зуунмод хотоос хойд зүгт талыг нь шороон, талыг нь засмал замаар 17 км яваад очно. Монголчууд маш их очдог юм билээ. Дотоодын аялал жуулчлал хөгжих боломжтой газар байна гэж бодсон доо. Суудлын жижиг тэрэг асуудалгүй явна, УБ хотоос холгүй тул очиж үзэхэд ердөө асуудалгүй. Харин анх удаа очиж байгаа болохоор замаа сайн мэдэхгүй төөрөөд, Дундговь аймаг явдаг замаар явчихаа шахсан билээ. :P


Манзушир хийд нь Богдхан уулын урд аманд байгалийн үзэсгэлэнтэй газар байрладаг юм билээ. Төвхөний хийд, Заяийн хийд, Манзуширын хийд гэх мэт монголын том том хутагт хувилгаадын байгуулж байсан хийд, сүм дуган бүгд л газрыг тун мэргэн сонгож байгуулснаараа хоорондоо их адилхан.


Машины зогсоол дээр машинаа тавиад дотогш ороход Манзушир музей байна.Дотор нь зураг авч болохгүй гэсэн болохоор зураг дарсангүй. 

 Шинэхэн ийм хөшөө босгосн байсан. Эсвэл дээр үед байсныг нь ч сэргээсэн байж магадгүй.

 Тэртээ урд цэнхэрлэн харагдах уулын тэнд магадгүй Дундговь аймаг байгаа байх хэхэ.

Хуучин хийдийн буурь, хэдэн халгай ургасан гэрийн буурьнаас өөр зүйл бол ховор юм билээ.

За энэ ямар гэлээ нэг хийд нь буулгаагүй үлдсэн байсан. 

Дотор нь зураг авч болж байсан тул зөндөө зураг дарсан даа.

 Чулуун бурхнууд зөндөө зурсан байдаг юм билээ. Манай Булган уулын Зонхов богдын дүр шиг.

Хийдийн буурь харагдаж байна.

Энэ зургыг эхнэр маань авсан байх. Би ийм цэцгийн зураг авдаггүй л дээ. Эхнэртээ зориулж Макро дуран авах хэрэгтэй юм байна даа.


Тогоо. Магадгүй сүм хийд мандаж байх үед энэ тогоонд 5 хонины мах зэрэг чанадаг байсан байж болох юм.

Хийд рүү өгсөх замд.


 Нураагаагүй үлдсэн дуган.













Манзуширын хийд маань нураахаас өмнө ийм байсан гэнээ. Ардын хувьсгалын дараа соёлынхоо хичнээн их өвийг хий дэмий галдан шатаагаа вэ???

Манзушир хутагт гэлүү дээ. За андуурсан байж болох юм. Ум ма ни бад ми хум.

Догшин дүртэй бурхан.











За манзурын талаар нэг иймэрхүү. Нийслэлээс ойрхон ер нь бол ойр ойрхон очиж үзэхэд сайхан л газар юм билээ. Өвөл нэг очиж үздэг юм билүү.


Recover root password in ubuntu

Нэг өдөр ажлын нэг сервер рүү ssh - ээр холбогдчихсон сууж байгаад, орой явахын өмнө терминалаа хаах гэтэл сервер маань үдээс хойш reboot хийгдээд холболт салсан байлаа. Гайхаад дахин ssh - ээр орох гэтэл root хэрэглэгчийн нууц үгийг сольсон байв. Системд маань халдлага хийж root эрхээр ороод нууц үгийг нь сольчихож гэсэн хардалт төрөв. Гэхдээ яаж ???

Энэ серверийг интернет хандалттай болгох гээд firewall дээр NAT хийчихсэн байсан нь халдлагад өртөх бай болоход нөлөөлсөн бололтой.
Ингээд хэрхэн root хэрэглэгчийн нууц үгийг сэргээх талаар судалж, хэдэн арга сонгоод туршиж үзэхээр сервер дээрээ өөрийн биеэр хүрэлцэн очиж дэлгэц, гар залгаад эхний аргыг хэрэглэсэн нь болчихлоо.

Урааа амархан юм байна!!! Сервер маань Убунту сервер 10,4 үйлдлийн системтэй байсныг энд хэлэх нь зүйтэй байх.

Ингээд дараа мартахгүйн үүднээс энд оруулаад баримтжуулчихья.

1. Серверийг reboot хийнэ.
2. Хэрэв сервер чинь single boot - тай бол ESC товчлуур дарж, GRUB -н дэлгэцийг гаргаж ирнэ. Dual Boot - тай бол ESC дарах шаардлагагүй GRUB -н сонголтууд гарч ирнэ.
3. GRUB - н бүүт хийх сонголтуудаас Recovery Mode - г сонгоно.
4. Орсоны дараа Boot - н default тохиргоонууд гарч ирэх бөгөөд үүнээс kernel-г сонгож чиглүүлэгчээ аваачаад, гарныхаа "e" товчлуурыг дарж тухайн мөрийг засварлах сонголт руу орно.
5. Ингэхэд kernel - р бүүт хийгдэх параметерүүдийн жагсаалт гарах бөгөөд мөрийн төгсгөлд нь single rw init=/bin/bash мөрийг нэмж бичээд ENTER дарна.
6. Мөрийг засварлаж дууссаны дараа recovery mode - р boot хийж ороод passwd root гээд root хэрэглэгчийнхаа шинэ нууц үгийг оруулна.
7. Нууц үгийг оруулаад компьютерээ reboot хийгээд, хэвийн тохиргоогоор нь орно.

Дээрх хэдэн алхамын дагуу ажиллаж root хэрэглэгчийнхаа нууц үгийг сэргээгээд, root хэрэглэгчийн бичсэн түүхийг харахад тун сонирхолтой коммандуудыг терминал дээр өгч байсан нь харагдав. За энэ ч сонин биш, нэгэнт root эрхтэйгээ болоод авсан хойно хийсэн зүйлүүдийг нь буцаалаа. Азаар ноцтой зүйл хийгээгүй байв.

Эндээс ойлгосон зүйл гэвэл: root хэрэглэгчийнхээ нууц үгийг олигтойхон том жижиг үсэг, тоо, тэмдэгт оролцсоноор өгч байх. Бас англи хэлний үгийн санд байдаггүй үгээр өгөх нь үр дүнтэй. Учир нь миний нууц үг англи хэлний үгийн санд байдаг, 6 тэмдэгттэй байсан нь dictionary attack хийж олоход төвөггүй байсан бололтой. NAT хийгдсэн гэдгийг нь мартаад, гаднаасаа Firewall - р хамгаалагдсан тул яав л гэж гээд нууц үгээ анхаараагүй нь алдаа болсон байна.

Мөрий

10 шил пийвтай боллоо :-)

Мөн 5-р тоглолтоор ажлын залуутай мөрийцсэн өдрийн хоол бас байгаам байна.

Өөд өөдөөсөө өрсөн өөр өөр Монгол

Өөрийн захиалан уншдаг "Үндэстний тойм" сэтгүүлийн 2011/06/06-ны №22(70) дугаар дээр нийтлэгдсэн Д.Энхболдбаатарын "Өөд өөдөөсөө өрсөн өөр өөр монгол" нийтлэлийг илүү олон хүн уншаасай гэсэн үүднээс өөрийн блог дээрээ ямар нэгэн өөрчлөлтгүйгээр хуулан бичлээ. Энэ нийтлэлийг уншаад нэгийг бодож, өөрсдийн болон үндэс угсаа нэгтэй өвөрмонгол ахан дүүсийнхээ өмнө ямар ирээдүй хүлээж байгааг бодон тунгаана бизээ. Сэтгэл эмзэглүүлсэн бодит үнэн, харамсаад ч барахгүй түүхийн нугачааг яалтай билээ.

МЭРГЭНИЙ МӨР


Толгой хэсэг нь улаан нялга болж, хоёр хөл нь санжигнан няцлуулсан хүний цогцсыг хүрэн дээлтэй өвгөн засаж байгаа дотор арзганам зураг интернетээр цацагдаж дэлхий нийтийг хиртхийлгэлээ. Хятадын тээврийн "Чун Чэнг Групп "-ийн жолооч нүүрс тээвэрлэдэг хүнд даацын машинаар өвөрмонгол малчныг санаатайгаар дайрч хороосон хэрэг явдлын дуулиан өнгөрөгч сарын эхээр ийнхүү боссон юм. Энэ компаний тээвэрчид баруун Үзэмчний газар нутгыг талхиж, талын бэлчээрийг доройтуулан, дурын газраар хэдэн арван салаа зам гарган давхих болсныг малчид эсэргүүцэн тэмцэж байжээ. Тэмцлийг удирдаж байсан хүмүүсийн нэг нь тэрхүү машинд дайруулсан, талийгаач Мэргэн аж. БНХАУ-ын харьяанд, өөртөө засах автономит эрхтэйгээр оршиж байгаа Өвөр Монголын тухай, тэндхийн хүмүүсийн эрх, эрх чөлөөний тухай бидний бараг мартах шахсан сэдвийг энэ үйл явдал зүй ёсоор сэдрээв.
Санаатай аллага үйлдсэн хятад жолоочийн хэргийг хууль хяналтын байгууллага нь хэрэгсэхгүй болгох тал руу хазайлгаж эхэлсэн нь "даарин дээр давс" гэгч болж, Хошууны засгийн газарт талийгаачийн хэргийг зөв шийдүүлэхийг шаардахаар явж байсан хүмүүсийн заримыг замаас нь баривчилсан явдал бүр ч тос нэмлээ. Ингээд Баруун Үзэмчний төв хот Балгар голд малчид цуглан жагсаж, тэднийг цагдаагийн 100 гаруй, цэргийн 200 гаруй хүний бүрэлдэхүүнтэй хүчнийхэн элбэн хориглож эхэлсэн юм. Тэд 100 гаруй тооны малчдыг баривчилсан гэсэн албан бус мэдээ цацагдаж байна. Дараахан нь оюутан, сурагчид жагсаж, Хятадын засаг захиргаанаас шударга ёс, хүний эрхээ нэхэв. Тэмцлийн үеэр бас нэг охины хоёр хөлийг машинаар дайрсан байна.

Бүтэн өдөржин цувааны замыг хааж зогссон малчдын зарим нь малаа хотлуулах, цай унд уухаар явсан хойно архи ууж халамцсан хятад жолооч нар "Манай машин даатгалтай юм чинь нэг муу малчинг дайрахад 40 000 юань л төлнө. Асуудалгүй дайраад гаръя" хэмээн ярилцаж байжээ. Энэ яриа Хятадын жижиг үндэстнүүддээ чиглэсэн бодлого, хүний эрхийн хэм хэмжээг "илчиллээ" гэж дүгнэхэд хилс болохгүй. Монгол хүний "үнийг тогтоосон" жолооч нар бүрэнхий болоход гэрлээ асаан хөдөлж, гурван малчин өөдөөс нь гараа алдлан зогсоохоор оролдохыг юман чинээ тоолгүй хурдаа нэмж малчин Мэргэнийг дайран, 150 метр газар чиржээ.
ЦӨХРӨЛИЙН ЖИНДЭЭ

Хятадын албан ёсны мэдээллийн сайтуудад улсын даргын орлогч Си Жиньпин Италид айлчилж байна, хүүхдийн эрүүл мэндийн байдал илт сайжирч, эндэгдэл зэрэг эрүүл мэндийн үзүүлэлт хөгжингүй орны дунд зэргийн төвшинд хүрсэн, ХКН-ын Гадаад Харилцааны Газрын дарга Ван Жярүй Бээжинд Монгол улсын ЭБЭХ-ний сайд Д.Зоригт нартай уулзав, Хятадын үндэстний цөөнхийн уламжлалт спортын ёсдүгээр наадмын бэлтгэл ажил эрчимтэй явагдаж байна, Төвдийг энх тайвнаар чөлөөлсний 60 жилийн ой тохиож байна гэхчилэнгийн мэдээллүүд хөврөхийг үзвэл энэ оронд гайхалтай амар амгалан байгаа мэт сэтгэгдэл төрнө. Гэвч үнэндээ байдал тийм ч сайн биш байгааг ойрхоны шил дараалсан үйл явдлууд харуулж байна. Төвд, Шинжаан, Тайваны эргэн тойрны үйл явдлуудыг эргэцүүлсэн мэргэжилтнүүд "тэсрэхэд ганцхан сэжим" үлдээд байна гэж таамаглаж байгаа. Дэлхийн худалдааны байгууллагад элссэнээр Хятадын эдийн засгийн дотоод бугшмал байдал сэжүүрээсээ ил болоход хүрч, ялангуяа ажилгүйдэл, инфляцийн нөлөөлөл асар олон үндэстэн, уламжлал, шашин, түүхийн зөрчилдөөн бүхий энэ их гүрнийг үндэс сууриар нь ганхуулж эхэлсэн юм. Мэргэжилтнүүдийн "хүлээж" байсан "ганцхан сэжим" нь Өвөр Монгол байсан юм биш биз гэсэн цуу, дуулиан нэгэнт газар авчээ.
Итгэл найдвар хамгийн сүүлд үхдэг гэж ярьдаг. Харин цөхрөл хэзээ эхэлдэг юм бол? Баруун Үзэмчиний хэрэг явдал зүгээр л "бөглөө мулталсан" хэрэг бөгөөд жинхэнэ учир шалтгаан бүр ӨМӨЗО байгуулагдсан цагаас, түүнээс ч өмнөх үеийн тусгаар тогтнолын эрмэлзлээс эх үндэстэй нь мэдээж юм. Энэ хугацаанд өвөрмонголчууд Ар Монголоо улс төрийн түшиг тулгуур болно гэж удтал найдан хүлээсэн. Гэвч Ар Монголд нь тийм чадвар, эр зориг байсангүй. Ингээд тэд цөхөрч, итгэл алдаж эхэлсэн нь саяын хэрэг явдалд хандаж байгаа хандлагаас харагдаж байна. "Ар Монголчууд хөөрхийлөлтэй, өрөвдөлтэй, үхээнц дорой байна", "Монголын төр, засаг элэг нэгтнүүдийнхээ төлөө огтхон ч дуугарахгүй байгаа нь жигшүүртэй байна" гэхчилэн бичсэн сэтгэгдлүүд, геополитикийн шинэ нөхцөл байдлыг задлан шинжилж, урьд өмнөхөөс илүү глобал маягийн санаа дэвшүүлсэн нийтлэл зэргээс үзвэл одоо тэд биднийг харахаа больсон нь мэдэгдэнэ. Энэ цөхрөл чухам хэзээ эхэлсэн юм бол?


ЗОВЛОНГИЙН ДУРСАМЖ

Өвөрлөгчдийн эрх чөлөөний төлөө тэмцэгч асан Даваасамбуугийн Мөрөн хэдэн жилийн мөнө бичсэн "Миний өчил" нийтлэлдээ ӨМӨЗО-ны нөхцөл байдлыг гайхалтай зураглан өгүүлжээ. Тэрээр Сөнөд хошуунд 1964 онд төржээ. Түүнийг таван настай байхад буюу 1969 онд өөрийнх нь нэрлэснээр "их хядлага" болсон гэжээ. Намтар дурсамж гэж болох нийтлэлдээ тэр, "тэр үед миний дүү охин нэг настай байлаа. Эцэг минь хорих газарт явж, ээж минь сумын хорих газарт хоригдож байлаа. Ээж маань хааяа ганц нэг ирээд дүүг хөхүүлдэг. Нэг охин дүү өвчлөөд байхад Маогийн томилсон, монголчуудад туслах гэсэн нэртэй эмч нар муу хүний хүүхэд, улсаасаа урвагчийн зулзага гээд хорт зүү тавин алав. Миний эцэгтэй хамт ажилладаг Монгол улсад сургууль төгссөн эмэгтэй багшийг Монголын тагнуул хийсэн баримтаа гарга гэхэд угаас түүнд тийм баримт байхгүй тул эхлээд хятад эмэгтэй Ху овогт, дараа нь бусад алан хядагч нар түүний бэлэг эрхтнийг нь олсон дээсээр хөрөөдөж дараа нь бэлэг эрхтэнд нь цаасан буу тавьж алсан байлаа. 1968-1969 онуудад 45953 хүн алагдав. Мөн 79000 хүн тахир дутуу болов. Хятадаас монголчуудад тулгаж байсан фашист эрүү тамыг тоолж нэрлэхүйеэ бэрх. Орчлонгийн бүх эрүүг амсуулан "Өвөр ардын нам", "Дугуй нам", "Залуусын нам", "Нэгдмэл нам", "Найрамдал нам", "Соёл нам", "Ардчилсан нам", "Өвөр ардын эвсэл", "Улаан булан нам", "Тусгаар нам", "Зүйтэй нам", "Элсэн нам", "Цэвэгжавын нам", "Цогбадрахын нам", "Бургасан нам", "Архичин нам", "Хүүхэнчүүд нам", "Хомоол нам", "Аргал нам", "Чимэглэл нам" зэрэг зохиомол намд тулгаж монголчуудыг хядаж байжээ" гэхчилэн бичжээ. Тэрээр Өвөрмонголдоо байх аргагүй болж, Шведэд дүрвэн амьдарч байгаад 2003 онд таалал болсон юм.

"ШИНЭ МОНГОЛ" ҮЗЭЛ

Улаанбаатарт аспирантурт суралцаж байгаа өвөрлөгч нөхөртөө би "цөхрөл хэзээнээс вэ?" гэсэн асуултаа тавив. Тэр миний анзааргатайг олзуурхангаа, үнэхээр өвөрмонголчууд ар монголчуудаасаа юу ч хүсэн хүлээхээ больсныг "илчилсэн" юм. Түүний тайлбарласнаар, 100 жилийн өмнөх Богд хаант Монгол Улсын үед ид сэргэн идэвхижсэн "Нармай Монгол"-ийн үзэл санааг өнөөгийн ар монголчуудын "Шинэ монгол"-ын үзэл санаа гээчтэй сөргөлдүүлэн тавьж буй юм байна. "Шинэ монгол" үзэл гэдэг нь хуучин Зөвлөлтийн оролцоотойгоор одоогийн Монгол Улсыг байгуулсан Большевик маягийн дотоод, гадаад бодлогоор боловсорогдож, улмаар Орос, Хятад гэх хоёр гүрнээс мөнхийн харьяат байдалд "төвийн сахисан", "дипломат улс төр"-ийн аргаар олон улсын эрхээ "баталгаажуулсан", хэтдээ нийт монголчуудын оршин тогтнох эсэх эрх ашгийг төлөөлүүлсэн үзэл гэх. Энэ нь зөвхөн Монгол Улсын хилийн дотор л монголчууд монгол биш болсон гэх "шинэ үзлээр" баяжсаныг ч тэр тайлбарласан юм. Өвөрмонголчууд нэгэнт хятадчилагдаад дууссан тул тэдэнтэй нэгдэж нийлэх нь харин ч "оргиналь" монгол үндэстнийг уусган мөхөөх аюултай гэж. "Шинэ Монгол" гээч үзэл санаатай болчихсон ар монголчуудаас юу ч хүсэн хүлээгээд нэмэргүй агаад геополитикийн хувьд ч бие биендээ өмөг түшиг болж чадахгүй гэсэн цөхрөлөөр тэд нэгэнт "өвчилчихжээ". Цаашлаад "Шинэ Монгол" үзэл санааны уг сурвалж нь Хятадын уусган устгах бодлого бөгөөд "Монголын төрийн өндөрлөгт байгаа эрлийз голцуутай лобби бүлгээр дамжуулан Хятад өөрсдийн эрх ашгийг гүйцэлдүүлж байдаг" аж.

"АР ТАЛ"-ЫН АСУУДАЛ

Төвдөд явуулж байгаа хөрөнгө оруулалтын болон засаг захиргааны шинэчлэлтийн бодлогодоо илүүтэй анхаарал хандуулж байгаа Хятадын засгийн газарт Баруун үзэмчиний жижигхэн "будлианыг" ойшоож үзэх ноцтой нөхцөл байдал бий болоогүй ч гэлээ Өрөмчийн бослогыг дарсан үеийнхтэйгээ яг адилаар интернет болон мэдээллийн сүлжээг тасалж, хил гаалиар орж гарах хөл хөдөлгөөний хяналтыг чангатгажээ. Хамгийн сүүлд буюу тавдугаар сарын 23-нд болсон жагсаал цуглааны мэдээг мэдээлснээс хойш өвөрмонголын "үндэсний үзэлтэй" блог, сайтууд ямар ч шинэчлэл хийхгүй боллоо. Саяхан албан хэргээр Хөх хотод оччихоод буцахдаа нэг танил маань, хилийн шалган дээр нөүтбүүкээ асааж шалгуулан, сүүлийн үед бичсэн хувь, хувьсгалын бүх мэйлээ үзүүлж, утга агуулгыг нь тайлбарлаж байж гарч иржээ. Жагсаал цуглаанд оролцсон болон баривчлагдсан хүмүүс хэрхсэн талаар мэдээлэл олж чадсангүй. Энэ удаагын бяцхан тэсрэлтийг Хятадын Засгийн газар ингэсгээд нухчин дарчих л байх. Учир нь бидэнд итгэж найдахаа болиод, цөхөрч гүйцсэн өвөрлөгчдөд маань "жинтэй ар тал" байхгүй байгаа нь асуудал юм. Төвд, Шинжааны тэрслэгчид манайхны хэлэх дуртэйгаар "стратегийн" холбоотнуудтай. Тэмцэж архагшаад, лууг атиралдуулж, арвагануулж чаддаг болчихсон хүчнүүд. Хэдий тусгаар тогтнолын олон жилийн тэмүүлэлтэй ч гэлээ өвөрмонголчууд том колончлогчдоо арай л "жижигдэнэ".

АНУ-ын Номхон далайн тэнгисийн флот "Шинжаан бол хоёрдахь Косово" гэсэн агуулга бүхий хээрийн сургуулилтыг саяхан Казахстанд хийсэн. Өнгөрсөн онд Солонгосын хойгт дайн дэгдээх шахсан цэргийн сургуулилт нь АНУ цэрэг эдийн засгийн сонирхлоо Ази, Номхон далайн чигт хандуулсны хамгийн бодитой нотолгоо болж өнгөрсөн. Эдгээр бүс нутгийн улс төрийн үйл явдалд АНУ түлхүү анхаарч, тэр байтугай Ойрхи Дорнод болон Номхон далай гэсэн хоёр чиглэлээр "цөмрөн орох" бодлого баримталж байгаа нь Хятадын хойд нутгийнхны хувьд шинэ нөхцөл бий болгож байгаа гэж дүгнэх үндэс болж буй. Японтой эдийн засгийн болоод улс төрийн холбоотны харилцаатай АНУ-ын гүн гүнзгий шинэ түнш нь БНСУ болсныг үйл явдал нэгэнт харуулсан. АНУ-Япон-Солонгосын энэхүү ашиг сонирхлын тэнхлэгт байгалийн баялгийн "сүүлийн түшиц газар" гэгдэж байгаа Зүүн хойд Азид тулах гэц хэрэгтэй гэж стратегийн мэдлэгтэй зарим хүн дүгнэлт өгч буй. Мэргэжлийн байгууллагуудын хийсэн зарим судалгаанд 2030 он гэхэд манай гаригийн эх газрын хэвлийн нөөц баялаг үндсэндээ дуусгавар болох ба зөвхөн Төв болон Зүүн хойд Азийн тэгш өндөрлөг, далай тэнгисийн гүний нөөц дэлхий нийтийн материаллаг эрэлт хэрэгцээг хангана гэж үзэж байгаа юм. Энэ мэт барим тавим таамаг, судалгааны дүн нь ортой, оргүйн алин байлаа ч нөлөө бүхий гүрнүүдийн ашиг сонирхлыг огтлолцуулахад хангалттай хүрэлцэж байгаа нь дамжиггүй.

Үндэс угсаа нэгтэй Өвөрмонголын ахан дүүсийнхээ эх нутаг, эрх чөлөөний төлөө хийж буй тэмцлийг дэмжиж монголчууд Улаанбаатар дахь БНХАУ-ын ЭСЯ-ны үүдэнд эсэргүүцлийн цуглаан зохион байгууллаа. Үндэсний үзэлтэй бүлэглэлүүд, монгол улсад ажиллаж, амьдарч байгаа өвөрмонголчууд энэ цуглаанаар жижиг үндэстнүүдийнхээ эрхийг хангах, аливаа харгислал, дарангуйллаа зогсоохыг Хятадын засаг захиргаанд шаардав. Хас тэмдэгтэй туг, Монгол улсын төрийн далбаагаар өнгө зохируулсан цуглааны үндсэн агуулга нь монгол үндэстнүүдийг эв нэгдэлд дуудсан уриа байв.
НЯЦААГДААГҮЙ ҮНЭН

Ар монголчууд өвөрлөгчдөө Хятадаас булаан авах гэж хоёр ч удаа дайн хийсэн юм. 1945 оны Чөлөөлөх дайнд Монгол ардын арми оролцсон нь өнгөн дээрээ "Монгол-Зөвлөлтийн харилцааны туслах гэрээний үүрэг" гэх тайлбартай боловч цаанаа өөр яриа хөөрөөтэй байсныг түүхчид ярьж, бичсээр байгаа. И.В.Сталин гадаад, дотоод монголын асуудлаар Маог хүртэл нээнтэглэж байсан удаа бий. Монгол, Зөвлөлтийн цэрэг Өвөрмонгол руу орж ирснээр тэндэхийн тусгаар тогтнолын тэмцэл,хөдөлгөөнийг сааруулж, эцэст нь унтраахад хүргэжээ гэсэн түүхийн тайлбарыг сүүлийн үед өвөрлөгч эрдэмтэд хийх болсон байна.

Хүйтэн дайн дуусгавар болсон 1990-ээд оноос Ар Монголд оюун санааны задрал болж, өмч хөрөнгө, үзэл ухамсар, шашин шүтлэг хүртэл глобалчлагдан, сарниснаар үндэстний хувьд жинхэнэ ёсоор бутран задарсан гэж өвөрмонгол ахан дүүс дүгнэх болсон байна. Социализмын үед Оросуудын үзэл суртлын нөлөөнд байсан "шинэ монгол"-чууд ардчилалын үед Хятадын хөрөнгө мөнгөний нөлөө бүхий өөр "шинэ монгол" болж хувираад мөхлийнхээ зүгт мөлхөж байна хэмээн тэд биднийг өрөвдөн халаглаж байна.

Агуулга, хандлагын энэ эрс өөрчлөлт гадаад, дотоод монголчуудыг 180 хэм эргүүлжээ. Бусдын хамаарал, колончлол, дарлал дор байгаа гэж тэднийгээ өрөвддөг байсан бол одоо тэд биднийг өрөвч нүдээр харж байна. Хамгийн цочирдмоор нь "нармай" -тай эсрэгцүүлэн сөргөлдүүлсэн "шинэ монгол"-ын үзэл санааны тухай шүүмжлэлийг няцаах үг надад олдсонгүй. Асар том Хятад гүрэн задрах нь дэлхий нийтэд, тэр дундаа Монгол Улсад ашиггүй гэсэн байр суурийг би хувьдаа ортой гэж итгэж буй. Учир нь малын бэлчээрээ өмгөөлөн тэмцэж байгаа Баруун Үзэмчин хошуунд л гэхэд нийт хүн амынх нь ердөө 29,2 хувь нь л монголчууд. Бусад нь хань үндэстнүүд. Их юмны баглаа задарвал сад тавих нь гарцаагүй. Тэр цоорхойгоор хань нь ч, хуйхуй нь ч адилхан гоожно. Харин ч задгайрсан талынхаа жаахан цөөхнийг их нь булж ч мэднэ.

10н шил бар

НБА-гийн финал эхлээд сайхан байна даа.

Дэмжсэн бүх багууд минь хусуулж, захыг нь мушгих баггүй болсон болохоор энэ финалд Даллас Мавриксыг дэмжихээр шийдсэн.

Спурс, Лейкэрс, Хавкс гурав итгэл алдаж гурвуул эхний хоёр даваанд ээлж дараалан бүдэрч урам хугалсан.

Дараа нь тэгэхээс тэгэх гэсэн юм шиг Лэйкерс Майк Броуныг багийн ахлах дасгалжуулагч болгож бүүр ч урам хугаллаа. Одоо яая гэхэв нэг сайн хараагаад л өнгөрөхөөс. Мич Кипчак муу тэнэг.

Далласыг Жэйсон Кид, Шон Марион, Дирк Новицки, гээд бөгж зүүх эрхтэй болсон тоглогчид байгаа болохоор дэмжиж байгаа хэрэг л дээ. Ялангуяа Кид-д л сагсан бөмбөгийн замналаа дуусгахаас нь өмнө нэг бөгж зүүлгэх хэрэгтэй байгаа юм. Ямар агуу тоглогч билээ, нэг бөгжтэй тэтгэвэртээ гараасай л гэж хүсэж сууна.

Ахтайгаа мөрий тавьж Даллас түрүүлбэл 10 шил Тайгер шар айраг авч, Маяами түрүүлбэл 1 шил улаан дарс авч өгөхөөр болсон. Аль нь түрүүлэхийг харах л үлдлээ.

Аль нь түрүүлэх юм бол доо ???

Пийв уухнуу, улаан дарс ахдаа барих нь уу харж л сууя даа. Нээрээ нэг онцгүй зүйл нь финалын нэг ч тоглолт манай улсын цагаар амралтын өдөр гарч таарахгүй юм байна лээ. Броузерийн жижигхэн цонхонд Alt+Tab дараастай л хэсэг хэсгээр үзэх нь дээ.

Плэйофф ба миний таамаглал - 1

Дэлхийн хамгийн шилдэг лиг хамгийн сонирхолтой үедээ орох энэ мөчид хэдэн сар жилээр юм бичээгүй хуучруулсан блогтоо шинэ бичлэг нэмж байна. Юуны тухай гэдгийг тайлбарлах нь илүүц биз.

Плэйоффын эхний даваа ба миний таамаглал.

Өнөөдөр тоглох дөрвөн багийн таамаглал.

Chicago Bulls(62-20) - Indiana Pacers(37-45)

Чикагогын нялх бухнууд энэ улиралд ямар мундаг тоглож байгааг хэн хүнгүй л харж байна. Шагналаа аваагүй байгаа MVP (???) Деррик Рөүз, солилцоогоор ирсэн бүх одод тоглогч Карлос Бүүзэр, өсөн сайжирч байгаа Ноа нартай энэ багийн амжилт салшгүй холбоотой. Эхний тойргоо итгэл төгс даваад гарчихна гэдэгт итгэлтэй байна.

Тэдний өрсөлдөгч нь тийм ч сайн амжилттай биш Индиана. Од ч юм шиг биш ч юм шиг орон гаран тоглолт үзүүлдэг Дээни Грэнжер, Рой Хибберт, Майк Данливи гээд плэйоффын туршлага төдийлэн байхгүй залуучууд байгаа. Индиана энэ амжилтаараа өрнөд бүсэд байсан бол 12-р байранд байх байлаа. Дорнод бүсэд харьяалагддагтаа баярлах хэрэгтэй байх.

Чикаго 4-1 ээр цувралыг дуусгана гэж таамаглаж байна.

Philadelphia 76ers(41-41) - Маяами Хийт(58-24)

НБА-г үздэг сонирхдог хүмүүс гурван том бүлэгт хуваагддаг байх гэж би боддог. Жорданыг дэмжигчдийн бүлэг, Кобиг дэмжигчдийн бүлэг, Лэброныг дэмжигчдийн бүлэг гэж ... Хараад байхад 90-ээд оны НБА сонирхогч нар Жорданыг шүтэж, харин түүний дараагийн үеийн дэмжигч нар Кобиг Жорданы агуу амжилтын араас хөөж тоглож байгаа болохоор үзүүлэлт, статистик амжилтаар нь харьцуулдаг. Харин Леброн бол од болж гялалзаж гарч ирсэн цаг хугацаа нь Кобигийнхтай давхарддаг учраас хүмүүс энэ хоёрын тулааныг аваргын төлөө үзэхийг хүсдэг юм. Ийм финал болох аваас НБА-гийн түүхэн дэх хамгийн олон үзэгчтэй, хамгийн сонирхолтой финал болно гэдэгт огтхон ч эргэлзэх хэрэггүй. Гэвч ийм сайхан учрал тохиохгүй байсаар хэдэн оныг өнгөрөөлөө. Ийм финал болохгүй байгаад Леброн л буруутай. Коби бол сүүлийн гурван жил дарааллан финалд гараад ирсэн шүү дээ. Ганц дайчин ганцаарддаг гэдгийг мэдэрсэн Леброн Драфтын нэг ангийн хоёр сүпер одтой үгсэн хуйвалдаж нэг зорилгын төлөө тоглохоор болжээ. (Энэ гурав нэг багт орсоныг урьдчилсан тохиролцоо гэж боддог.) Тэдэнд бөгж л хэрэгтэй. Өөр юу ч хэрэггүй. Харин бөгжтэй болохын тулд тэйм.

Дорнод бүсийн 7-р байраар шалгарсан 76-чууд бол зөөлөн боорцог биш. Гэхдээ хатуу самар байж хараахан чадахгүй л болов уу. Тэд их гурвалын эсрэг юу хийж чадах вэ ???

Цувралыг 4-2 харьцаагаар Маяамигийн халуухан залуус дуусгана гэж таамаглалаа.

Atlanta Hawks(44-38) - Orlando Magic(52-30)

Плэйоффын нэгийн давааны хамгийн ширүүн тоглолт гарах цуврал гэж таамаглаж байна. Одоо тоглож байгаа хамгийн дөнгүүр төвийн тоглогч Шкафан цээжтэй Ховард, Хүчирхэг хулгана Жамеер Нелсон, турк залуу Хедо гээд л Орландо гарцаагүй сайн баг. Гол нь энэ багт довтолгоог эхлүүлдэг найруулан тоглогч дутуу юм уу даа гэсэн бодол байдаг. Дасгалжуулагч багаа нэг л хангалтгүй тоглуулаад байна уу даа. Харин Атланта бол Хорфорд, Смит, Жое Жонсон гээд залуучуудынхаа хүчээр хэдийнээ плэйофф-н баг болсон. Гэхдээ мөн л сүүлийн хоёр плэйофф-д хоёрдугаар шатаа давж чадаагүй гэсэн тааруухан амжилттай байгаа.

Улиралд энэ хоёр багын хоорондын харьцаа нь Атлантагын талд илүү байгаа шиг санаж байна. Гэхдээ л яаж ч магадгүй юм, аль нэгийг нь хожно гэж таамаглахаасаа ч айж байна. Гал гаргасан цуврал болно гэдэгт итгэлтэй байна. 4-3 - аар Атланта хожно гээд буудчихвал яадаг бол :P Долоон тоглолт бол болох байх. Харин Атланта юу Орландо юу таамаглалыг нээлттэй үлдээлээ. Атлантагийн талд 51 хувь.

Portland Trail Blazers(48-34) - Dallas Mavricks (57-25)

Портланд энэ улиралд ямар мундаг байнаа. Хэрвээ Оден бэртэл гэмтэлгүй Дюрантын хэмжээнд тоглоод (Дюрант - Оден гэсэн харьцуулалт утгагүй мэт санагдаж болох боловч нэг драфтын эхний хоёр сонголт учраас харьцууллаа. Дюрантаас илүү гэж үзээд сонгосон шүү дээ уг нь) Рой-н өвдөгний бэртэл байхгүй 100 хувь хүч чадлаа дайчилж тоглож байсан бол энэ баг өрнөдөд хэдийнээ хамгийн шилдэг нь байх байсан гэдэг нь тодорхой. Гэхдээ Алдриж дээрх хоёр тоглолчын дутуу орон зайг хангалттай нөхөж чадаж байгаа. Энэ улиралд магадгүй амжилт нь ахисан тоглогчын шагналыг авч болох юм. Даанч Кевин Лоов байгаа учраас авахгүй байх л даа. Одоо болтол яагаад бүх оддын тоглолтонд сонгоогүйг нь гайхдаг. Дээр нь аваад удаагүй байгаа боловч энэ багийн нэгэн хэсэг болж чадсан Жералд Воллес мөн нь плэйофф-т энэ багийн төлөө бүхнээ дайчилна.

Тэдний немц залуу Новицки тэргүүтэй Даллас Маврикс тулалдана. Жэйсон кидд, чандлер, терри гээд л мундаг тоглогч нар олон бий. Ганц харамсмаар юм нь Батлер гэмтлээс болоод плэйофф-д багтаа туслаж чадахгүй. Далласын тоглолт Терри-гийн тоглолттой холбоотой юм шиг санагддаг. Портландын залуучуудын эсрэг харьж яваа Далласынхан муугүй л тоглох байх, гэхдээ арай нь барахгүй болов уу.

Цувралд 4-2 - оор Портлэнд хожно гэж таамаглалаа.

За ингээд өнөөдөр тоглолт нь болох 8 багийн хувьд таамаглалаа дэвшүүллээ.

Мэдээж үргэлжлэл бий ... Тун удахгүй