Aquarium update 2012-01-25

Өчигдөр орой сууж байгаад аквариумаа жаахан цэвэрлэж, ганц нэг өөрчлөлт хийлээ. Өмнө нь ийм байсан.

Ийм өөрчлөлтүүд хийв:

• Усан дотор байсан гэрэлт цамхаг будаг нь ховхороод байсан тул авч хаяв. Анх загаснуудаа авахад энэ гэрэлт цамхагны гурван хаалганы хамгийн томоор нь мечноснуудын хамгийн том нь чөлөөтэй орж гардаг байсан бол өчигдрийн байдлаар хамгийн жижиг мечнос маань бараг л багтахаа байсан байна. Цамхагаа аваад хаячихаар загасаа хэрхэн томорч байгааг яаж мэдэх вэ байз ???
• Усыг дээшээ татаад, дээрээс гоожуулахдаа шүүлтүүрээр шүүж гоожуулдаг аквариумны өөрийнх нь шүүлтүүр усаа сайн шүүж чадахгүй байгаа юм шиг санагдаад байхаар нь усан дотроо байдаг филтер нэмж тавьлаа. Ажиллаж байхдаа чимээ ихтэй, аквариумны урсгалыг арай л ихэсгэдэг муу талтай ч гэсэн усыг цэвэршүүлэхдээ арай л илүү юм шиг санагдлаа.
• Аквариумны арын хананд нь ногоон ургамалтай зураг наалаа. Уур амьсгал шал өөр болоод л явчиж байна лээ шүү.
• Агааржуулагчны хошууг хайрганд булж, дээрээс нь чулуу тавив. Ингэснээр чулуун дундаас агаар гараад байгаа юм шиг сонирхолтой харагдаж байна. 

За тэгээд ёроолын бохир уснаас 10 литрын хувин орчмыг соруулж хаяад, шинэ усаар сэлбэв. Арай л цэвэрхэн боллоо. Даанч зураг жаахан бүрсийлттэй гарсан байна.

Агааржуулагч ажиллаж байгаа нь.

Нэг иймэрхүү боллоо. Өдөр 1 цагийн үед жаахан нар тусдаг болоод ч тэр юм уу? ус нь жаахан замагтах гээд байна. Соом, дун гэх мэт байгалийн цэвэрлэгчдийг тэнцвэрийг нь хангах хэмжээний тоогоор авч хийхээс. 2 ширхэг гахай соом байгаа боловч арай л жулдаад байх шиг байна. Гараа усан дотор хийгээд ургамал, хайрга, агааржуулагчаа засаж байхад загаснууд маань ирээд гарын шууг чимчигнүүлж гижиг хүргээд хөгжилтэй л байлаа.

 Гахай соом ажлаа хийж байгаа нь.

 Соом тасралтгүй хөдөлмөрлөсөөр л.

Чулуун дундаас агаар гарч байгаа нь.

Одоогын байдлаар нэг иймэрхүү байна. Одоо нэг асуудал байгаа нь амазон ургамалууд маань жаахан харлаад ургалт нь муудаад байна. Гол хэсгийн ард байсан ургамалыг сугалж авсан чинь үндэс нь бараг байхгүй болчихсон байна лээ. Энэ асуудлыг шийдээд ургамалаа сайхан ургуулчихвал ч болоод л явчих гээд байна.

Эр мечноснууд маань бие гүйцэж байгаа бололтой байнга л зодоон цохион хийх юм. Өнөө өглөө нэг ийм бичлэг хийчихлээ.